Detaje të reja janë zbardhur rreth vdekjes së papritur të këngëtarit të njohur shqiptar, Shpat Kasapi.
Mësohet se këngëtari ka humbur jetën teksa ishte në një koncert në Bolonja të Italisë. Sipas burimeve, 38-vjeçari nuk është ndier mirë gjatë performancës dhe më pas ka humbur jetën. Dyshohet se shkaku i vdekjes ka qenë një atak kardiak, megjithëse artisti nuk raportohej të kishte pasur probleme të mëparshme të zemrës.
Lajmi ka tronditur publikun mbarë shqiptar, pasi Kasapi ishte prej më shumë se dy dekadash një ndër emrat më të dashur të muzikës moderne shqiptare.
Shpat Kasapi, i lindur më 1 maj 1985 në Tetovë dhe me origjinë dibrane, u rrit në një familje me traditë muzikore. Që në fillim të viteve 2000 ai u ngjit shpejt në skenë, duke fituar famë me hitet e tij ritmike dhe performancat energjike. Këngë si “A më do?”, “Valle Kosovare”, “Dashni pa limit” dhe “Aroma e saj” e shndërruan në një ikonë të muzikës shqiptare.
Gjatë karrierës, Kasapi mori pjesë në festivale të rëndësishme dhe realizoi bashkëpunime të suksesshme që lanë gjurmë te publiku, duke ruajtur popullaritetin deri në ditët e fundit. Ndërkohë, komuniteti artistik dhe fansat kanë shpërndarë mesazhe ngushëllimi, duke e cilësuar vdekjen e tij një humbje të madhe për artin shqiptar.
Autoritetet italiane pritet të publikojnë raportin zyrtar mbi shkaqet e vdekjes.
