Shifrat e divorceve në Shqipëri vijojnë të mbeten alarmante. Nga mbi 16 mijë martesa të regjistruara brenda një viti, më shumë se 4 mijë çifte përfundojnë në divorc, duke treguar një trend në rritje të ndarjeve dhe dobësim të modelit tradicional të familjes shqiptare.
Simbolet e martesës, vellot e bardha, dasmat tradicionale dhe premtimi “derisa vdekja të na ndajë” duket se po humbasin peshë vit pas viti, ndërsa çiftet përballen me sfida të reja ekonomike, sociale dhe kulturore.
Qytetarët rendisin ekonominë, modernizimin e jetesës dhe mungesën e durimit si shtysat kryesore drejt prishjes së martesave.
“Është shkatërrim ndarja, por ka ardhur aty ku nuk mban më. E para është ekonomia, pastaj vijnë të tjerat. Familjet janë modernizuar, nuk janë më si dikur. Brezi i ri është brezi i teknologjisë”, shprehet një qytetar për mediat.
Një tjetër qytetare thotë se problemet vijnë nga mungesa e tolerancës:
“Po nuk durojnë as meshkujt, as femrat sot. Nuk ulen më kokën as njëri, as tjetri.”
Avokatët e fushës pranojnë se numrat janë shqetësues, duke theksuar se divorci dikur ishte tabu, ndërsa sot është kthyer në një procedurë të zakonshme.
“Kjo është një shifër shumë e lartë, sepse dikur divorci ndodhte vetëm kur jetesa mes bashkëshortëve bëhej e padurueshme. Shkaqet janë të ndryshme: mosjetesa e përbashkët, grindjet, tradhtitë, mungesa e jetës seksuale, por edhe ndikimi i teknologjisë dhe faktorëve socialë.”
Ekspertët nënvizojnë se familja ka qenë gjithmonë bërthama e shoqërisë shqiptare dhe se konfliktet duhet të trajtohen fillimisht përmes ndërmjetësimit dhe komunikimit. Sipas juristëve, shumë prej çifteve që kërkojnë divorcin mund të shmangin ndarjen nëse ndërhyhet më herët për të zgjidhur keqkuptimet dhe problemet e përditshme.
Megjithatë, tendenca e rritjes së divorceve tregon se familja shqiptare po përballet me transformime të thella sociale dhe kulturore dhe se modeli tradicional nuk është më i mjaftueshëm për të mbajtur martesat të qëndrueshme.
