Arena Channels, një grup mediatik në pronësi të Telekom Srbija, ka zyrtarizuar hyrjen e tij në tregun shqiptar me themelimin e kompanisë Arena News Channels Two Albania. Kjo kompani u regjistrua zyrtarisht këtë të enjte në Qendrën Kombëtare të Biznesit.
Aktiviteti i kompanisë përfshin prodhimin, transmetimin, dhe shpërndarjen e përmbajtjeve audiovizive nëpërmjet televizioneve, internetit, platformave digjitale dhe rrjeteve sociale. Po ashtu, ajo do të fokusohet në botimin dhe administrimin e mediave online dhe publikimeve elektronike.
Adresa e regjistruar e shoqërisë është në rrugën Dervish Shaba, Blloku B-1, ku janë të vendosura dhe disa kompani të tjera, përfshirë televizioni Adria Med i biznesmenit Enver Mehmeti. Mehmeti ka sqaruar se Arena Channels nuk ka lidhje me televizionin e tij.
Historia e Arena News Channel Two fillon më 13 mars 2009 me themelimin nga Goran Đaković si “Telecommunications Company HD-WIN doo”. Më vonë, më 22 maj 2019, kompania u ble nga “Telekom Srbija” AD, duke e bërë një entitet të kontrolluar indirekt nga qeveria serbe.
Arena Channel Group është njohur për të drejtat e transmetimit të kanaleve sportive në rajon, përfshirë Serbinë, Bosnje Hercegovinën, Malin e Zi dhe Kroacinë. Gjithashtu, mban licencën për Euronews në Serbi.
Hyrja e Arena Channel në Shqipëri ndodh në një kohë kur tregu mediatik shqiptar po pëson ndryshime të mëdha. Së fundmi, familja Dulaku ka shitur platformën Tring një kompanie të lidhur me grupin Devolli të Kosovës. Ndërkohë, ka zëra se edhe platforma Digitalb mund të jetë në proces shitjeje, por ende nuk ka konfirmime zyrtare për këtë zhvillim.
Po ju bashkangjisim edhe ekstraktin: sipas tij, shoqëria do të përfshihet kryesisht në prodhimin, transmetimin dhe shpërndarjen e përmbajtjeve audiovizive përmes televizionit, internetit, platformave digjitale dhe rrjeteve sociale.
