Detaje të reja janë zbardhur nga ngjarja e paprecedentë që tronditi Librazhdin pak ditë më parë.
Një 36-vjeçar, Ismail Kllogjri, është arrestuar nga policia pasi dyshohet se i ka dhënë valium prindërve të bashkëshortes së tij dhe më pas iu ka vjedhur një shumë parash dhe një celular.
Pas disa ditësh qëndrimi në spitalin QSUT në gjendje të rëndë, çifti i të moshuarve rrëfehet për mediat. E moshuara, ende e tronditur nga ngjarja, tregoi momentet e fundit para se të humbnin ndjenjat.
“Ishim duke ndenjur, kur erdhi dhëndri, na pyeti si jeni dhe më pas nuk mbaj më mënd gjë. Djali me gjithë nusen na gjetën pa ndjenja. Nuk mbaj mend shumë gjëra. Burri nuk lëviz fare rri vetëm shtrirë”, u shpreh ajo.
Ngjarja ka shkaktuar shqetësim të madh në komunitet, ndërsa autoritetet po vijojnë hetimet për rrethanat e saktë të ngjarjes dhe për konfiskimin e çdo prove që lidhet me këtë akt kriminal.
