Një 30-vjeçare shqiptare është arrestuar në Wellen, Belgjikë, pasi policia zbuloi se kishte kthyer banesën e saj në një plantacion profesional të kanabisit. Gjatë kontrollit, u sekuestruan 125 bimë kanabisi në disa dhoma të banesës, të cilat ishin jashtëzakonisht të gjata dhe gati për korrje. Të dhënat tregojnë se plantacioni funksiononte prej një kohe të gjatë. E reja u dërgua para gjykatës dhe aktualisht ndodhet në burg.
Në të njëjtën ditë, një gjykatë në Leuven dënoi edhe gjashtë shtetas shqiptarë të tjerë për kultivim, posedim dhe shitje të kanabisit në kuadër të një organizate kriminale. Dënimet varionin nga 12 deri në 40 muaj burg, me gjoba nga 8,000 deri në 20,000 euro. Për më tepër, të dënuarit duhet të paguajnë 42,000 euro dëme ndaj një kompanie energjetike për vjedhjen e energjisë.
Rastet e fundit pasojnë një valë arrestimesh të shqiptarëve të përfshirë në trafikun dhe kultivimin e kanabisit në Belgjikë, duke nxitur shqetësim për përhapjen e këtij fenomeni në vend.
