Një video e pazakontë ka mbërritur në redaksinë e JOQ Albania nga një qytetar i Sarandës, i cili raporton një ngjarje shqetësuese në lagjen nr. 4 të qytetit bregdetar.
Siç shihet qartë në pamjet filmike, dy gra, të identifikuara nga banorët me inicialet V.B. dhe M.S.,shihen duke marrë një kapak pusete buzë trotuarit dhe më pas futen në shkallët e një pallati aty pranë.
Sipas mesazhit të qytetarit, raste të tilla janë bërë të shpeshta dhe kapakët e pusetave janë hequr disa herë, duke krijuar rrezik serioz për fëmijët dhe kalimtarët në zonë. Ai thotë se banorët janë ankuar në polici dhe bashki, por sipas tyre nuk është marrë asnjë masë deri tani.
Megjithëse veprimi i filmuar është i qartë, motivet e dy grave mbeten të panjohura. Banorët dyshojnë se pas sjelljes së tyre mund të fshihen probleme të rënda sociale, kushte të vështira ekonomike ose sfida të shëndetit mendor, elemente që kërkojnë vlerësim të mëtejshëm nga institucionet kompetente.
Banorët e lagjes kërkojnë ndërhyrje urgjente për të siguruar zonën dhe për të shmangur incidente të rrezikshme, ndërsa presin që autoritetet të marrin në dorë situatën dhe ta trajtojnë rastin siç duhet.
https://www.youtube.com/shorts/waOxFE8xcLw?feature=share
